De Infinity- Pool in Olte het au das Johr wieder 8 Wyfelder Haifisch aglockt. S’afänglich regnerische Wetter het üsi Vorfreud nöd chöne trüebe.

Vorallem s’junge Herreteam (Fabian, Kim und David, verstärcht durch d’Jelena) isch so motiviert gsi, dass sie i de 1. Disziplin scho vor em Pfiff hend wölle loslege. Zum Glück isch de Umgang mit Strofpünkt a de RWO relativ locker ;-)

Zudem isch s’Mitschwimme i zwei ufenand folgende Läuf sowohl regelkonform, wie au energietechnisch machbar. Mengisch fühlt sichs sogar besser ah i dem Lauf, wo me andere Teams tuet ushelfe, wie denn wenn me fürs eigene Team schwimmt ;-)

S’Dameteam (Livia, Penelope, Simone und Eveline) het zeiget, dass sich regelmässigs Puppetraining durchus lohnt und het i dere Disziplin ihres Tagesbestergebnis gholt.

Ball werfe isch das Mol leider nöd üsi Spezialität gsi und mir hend kein Supertreffer chöne mache. Usserdem hend mir leider noch drüü Diszipline bereits zwei verloreni Flosse und ei fast verloreni Puppe z’verzeichne gha. Do chönt me für de nöchst Wettkampf s’Ballwerfe und d’Flosseuswahl viellicht vorab mol im Training usprobiere…

S’Aareschwimme het es bitzli a d’Seine erinneret, eifach ohni chrank werde ;-)

Di agnehm Wassertemperatur, d’Beschlünigung durch d’Strömig und de Kick vom Abespringe vo de Brugg het üs nomal Power geh für di letschte zwei Diszipline.

Bim Leinele het s’Herreteam denn zeiget, was sie im Training bim Dani glernt hend und hend sogar d’Schaffhuuser gschlage.

Im Aschluss sind mir zäme mit Bauma wieder is Aarebistro. Bi feine Burger und Fischchnusperli hend mir de Tag gmüeltich usklinge loh.

Erkenntnis vom Tag: bim Schwimme wird me nass ;-)

Autorinnen: Eveline und Livia